لما تلاقي اتنين بيحبوا بعض وقارفينك بقصة حبهم العنيفة اللزجة. اتقالت في فيلم عسكر في المعسكر على لسان خِضر محمد هنيدي لسعدية خطيبته لقاء الخميسي لما كانوا متقابلين في غيط الدرة وولع بيهم.
- هي داليا اتخطبت؟
= آه وقاعدة تنزل صورها مع خطيبها كل شوية والحب ولع في الدرة عالآخر يعني.
لما حد يوصل لك معلومة عن طريق حد تاني هو واخده محل ثقة بدون أي مبرر. أصلها في فيلم صعيدي في الجامعة اﻷمريكية لما عبلة غادة عادل قالت لخلف محمد هنيدي إن سراج هاني رمزي قال لها إن أحمد فتحي عبد الوهاب متراقب من أمن الدولة.
- أنت جبت الكلام دا منين يا ابني؟
= شريف قال لي.
- وشريف دا رئيس مراجيح مولد النبي يعني؟
لما حد مستواه متواضع يقرر يتعوج عليك أو ينكر أصله، ممكن تستخدم معاه الجملة دي.
قالها محمد هنيدي بشخصية خالتي نعيمة في مسرحية ألابندا عن أمه اللي هي بتكرهها عشان بتعاملها وحش.
- دي شيماء اتغيرت خالص حتى طريقة كلامها ولبسها.
= شكلها نسيت أصلها وهتعمل بنت ناس بنت بتاعة الجزر.
لما حد يقترح عليك حاجة أنت بتحبها بس بتحاول تبعد عنها. اتقالت في فيلم يا أنا يا خالتي من خالتي نوسة محمد هنيدي لببلاوي حسن حسني لما كان بيقترح عليها يفصل لها فستان بإيده في بيته.
- باقول لك إيه ما تسيبك من الدايت دا وتعالى ناكل شاورما.
= أنت كدا بتجرجرني للرذيلة، وأنا الصراحة باحبها.
- ما تيجي نفوِّت المحاضرة دي ونروح نقعد عالقهوة؟
= أنت كدا بتجرجرني للرذيلة، وأنا الصراحة باحبها.
ديه بتسخدم لما تكون مسافر بره مصر و تعرف المصري من شكله من بين كل الناس كأنه مكتوب على وشه مصري ... فتشوفه من بعيد و تقول طه برضوا طه
ديه كانت من فيلم محمد هنيدي وش إجرام ، كان متنكر و عامل نفسه لاعب كرة سلة و جمال عيد برضع عرفه و قاله ايه الي انته عامله في نفسك ده يا طه ، و محمد هنيدي ينكر و هو يقوله طه برضوا طه
ممكن تقولها لو بتتكلم على حد بتحبه أو ليه مَعَزَّة خاصة عندك، وممكن برضه تقولها لو بتتكلم بسخرية عن حد بتكرهه. تنفع في الحالتين. قالها محمد هنيدي بشخصية خالتي نعيمة في مسرحية ألابندا لما كان بيكلم علاء ولي الدين عن فرح أخوه سامي، ابن الست اللي نعيمة بتكرهها.
- ما كنتش إنك صاحب أشرف.
= أيوة يا عم دا أشرف دا روحي روحي روحي وقلبي من جوة كدا.
- هو أنتِ مش بتحبي لمياء بجد؟
= لا إزاي... دي لميا دي روحي روحي روحي